На денешната комеморација во чест на вонр. проф. м-р Сара Пројковска која се одржа на Факултетот за музичка уметност во Скопје, беа присутни нејзините студенти, колеги, соработници и членови на семејството.

Посебно емотивен момент беше настапот на студентите кои ја изведоа песната „Кога те нема“ од Хелена Благне напишана од легендарниот композитор Кире Костов, татко на Ана Костадиновска која исто како и Сара пееше придружни вокали на групата ДНК.

Меѓу соработниците на Сара беа присутни и Каролина Гочева, Андријана Јаневска, Биба Додева, Ана Бунтеска, Никола Мицевски и менаџерот Филип Николовски од „Авалон“.

Пијанистот Дино Имери кој изјави дека Пројковска, која беше позната по својата „заразна“ насмевка и специфичен хумор, на шега велела дека е вљубена во Бетовен во нејзина чест отсвири дело од Бетовен.

Во знак на почит кон жртвите кои загинаа во пожарот во дискотеката „Пулс“ во Кочани за време на концертот на групата „ДНК“ на 16 март, од терасата на Факултетот за музичка уметност (ФМУ) во Скопје по комеморацијата, беа пуштени бели балони.

Покрај Сара, меѓу настраданите членови на беднот  „ДНК“ се и пејачот Андреј Ѓорѓиески, гитаристот Андреј Коларов, тапанарот Ѓорѓи Ѓорѓиев, пијанистот Филип Стевановски, битбоксерот Мартин Атанасовски – Буцо, тонецот Игор Велков, како и официјалниот фотограф на групата Александар Ефремов.

Пројковска беше самохрана мајка на две деца. Таа пееше придружни вокали на речиси сите поп пејачи во Македонија.