Натпреварот помеѓу Лече и Аталанта, кој требаше да се одигра утревечер (четврток) од 20:45 часот, е одложен поради смртта на физиотерапевтот на домашниот тим, Грацијано Фиорита.

Клубот од Лече во официјално соопштение потврди дека Фиорита починал ненадејно за време на тренинг-кампот на тимот. Трагедијата оставила силен емоционален шок кај фудбалерите и стручниот штаб, поради што е донесена одлука натпреварот од 33. коло во Серија А да биде одложен.

„Со длабока тага известуваме дека нашиот долгогодишен физиотерапевт и драг пријател, Грацијано Фиорита, почина за време на престојот со екипата. Сите сме во жалост. Клубот, стручниот штаб и фудбалерите се сплотени во болката“, стои во објавата од Лече.

Фиорита беше почитуван член на спортскиот колектив и дел од клубот веќе неколку сезони. Неговата смрт е тежок удар за целото спортско семејство на Лече, а одлуката за одложување на натпреварот е поздравена со разбирање и сочувство од Аталанта и фудбалската јавност.

Лече моментално се наоѓа на 17. позиција на табелата со 26 бодови и води жестока битка за опстанок во Серија А, додека Аталанта е трета со 64 освоени поени и е во трка за пласман во Лигата на шампионите.

Нов термин за одигрување на натпреварот ќе биде дополнително соопштен од страна на Серија А.

L’U.S. Lecce, profondamente sconvolta, comunica che è venuto a mancare improvvisamente Graziano Fiorita. Il fisioterapista, da oltre vent’anni nelle fila giallorosse, si trovava con la squadra nel ritiro di Coccaglio. pic.twitter.com/i67p5XJnPA

— U.S. Lecce (@OfficialUSLecce) April 24, 2025