Кривичниот суд Скопје го одобри обвинителниот акт на Основното јавно обвинителство со кој Велибор Манев, Боре Видевски и Влатко Кешишев се обвинети за убиство и грабнување на 14-годишната Вања Ѓорчевска и 74-годишниот Панче Жежовски. За грабнување е обвинет и таткото на Вања Ѓорчевска, Александар.

По разгледување и ценење на актот како и доставените приговори изјавени против обвинението од страна на одбраната на обвинетите, донесе решение со кое – Приговорите на одбраната се одбиваат како неосновани, а Обвинителниот акт се одобрува во целост. Врз основа на одобрениот обвинителен акт, се формира кривично – правен предмет кој согласно АКМИС системот ќе биде распределен на понатамошно постапување, за што , ценејќи го јавниот интерес за случајот, јавноста ќе биде благовремено известена, соопштија од Судот.

Постапката против првоосомничениот за двојното убиство, Љупчо Палевски – Палчо,  уште е во фаза на истрага.

Таткото на Вања Ѓорчевска, Александар Ѓорчевски со одлука на Врховниот суд два месеци е во куќен притвор. По одржаната седница Советот за казниви дела донесе решение со кое неговата жалба преку адвокатот Владимир Туфегџиќ беше уважена, а притворот се замени со куќен притвор и мерка на претпазливост.

Александар Ѓорчевски во текот на целата истрага негира каква било поврзаност со кривично-правниот настан во кој животот го загуби неговата ќерка.

Се соочувам со апсурдни обвинувања до апсолутност. Во моментите кога не можев да пуштам ниту глас, ниту солза, бев обвинуван во полициска станица и тоа за работи што не ми се јасни и не ги разбирам.  Ми одзедоа сè. Не сум веќе ни родител ни татко, ехо од човек остана од мене. И јас водев моја истрага. Би сакал да го дознаам идентитетот на луѓето што го направија ова и сите тие се подеднакво виновни, рече пред два месеци Ѓорчевски кога пред Врховниот суд бараше да му се замени мерката притвор со куќен притвор.

Во меѓувреме, како што истакна неговиот бранител, адвокатот Владимир Туфегџиќ, семејната трагедија што ја преживува неговиот клиент ескалира бидејќи тој нема контакт со другата ќерка, односно не му е дозволено да го види своето друго дете, поради што во случајот морал да се вклучи Центарот за социјални работи. Во Центарот за социјални работи викнати биле мајката на Вања Ѓорчевска, таткото Александар и сестрата на Александар.

Дополнително, како што истакна Туфегџиќ пред Врховниот суд, на Александар Ѓорчевски му била вршена и тортура за што постоеле материјални докази во форма на медицински извештаи од Торакалната клиника. За ова Хелсиншкиот комитет за човекови права извршил и разговор со Ѓорчевски. Адвокатот побара да се намали трагедијата која ја поминува осомничениот, а која добива драматични размери. Туфегџиќ истакна дека не е основано деека Александар би бегал, од причина што тој живее за да се заврши предметот.

Трагичната судбина на овој човек, покрај тоа што го има загубено детето, е во добра мерка инспирирана од несреќната и непрофесионална прес-конференција на тогашниот министер за внатрешни работи кој изнесе непроверени наводи, кои во јавноста беа пласирани во форма на обвинение и осудителна пресуда, без да се води сметка за пресумпцијата на невиност. Сето тоа личи како да е кажано крајно невнимателно и во добра мерка улога во таа работа за жал имаат и некои луѓе кои биле дел од владејачката структура. Биле и пратеници кои на своите Фејсбук профили веднаш се приклучија и ги поддржаа наводите што тогаш ги кажа министерот за внатрешни работи, рече пред два месеци адвокатот на Ѓорчевски, Владимир Туфегџиќ.

Таткото на Вања нема контакт со другата ќерка: Не сум веќе ни родител, ни татко – ехо од човек остана од мене