Новак Ѓоковиќ со победа во четири сета ја започна одбраната на титулата на Вимблдон. Првиот носител во четири сета со 4:6,6:1,6:2,6:2 го совлада Британецот Џек Дрејпер.
– Мислам дека на овој меч сервирав одлично, мислам дека дури успеав да го израмнам рекордот од оваа или од минатата година во Австралија кога во четири сета имав 25 ас сервиси. Навистина не можам да бидам позадоволен од својот сервис – изјави Ѓоковиќ по победата над Дрејпер.

Ѓоковиќ потоа беше запрашан дали е точно дека таткото на Џек Дрејпер, Роџер бил личноста која во 2006 година се обидел да го убеди него и неговите родители да земе британско државјанство.
– Оваа информација на прочитав вчера. Не знам кој во тоа време разговараше со мојот татко за да земам британско државјанство. Да бидам искрен, не знаев за тоа. И јас бев изненаден кога прочитав дека тоа бил таткото на Џек. Сепак, тоа беше многу одамна. Добив понуда, имаше разговори, но сето тоа траеше кратко бидејќи моите родители не сакаа да си заминат од Србија иако понудата беше доста примамлива  – одговори Ѓоковиќ.