Таравари: Сегашниот состав на владата не го одразува вистинскиот состав на општеството
Претседателот на Алијансата за Албанците, Арбен Таравари, изрази „сериозна загриженост за легитимитетот на актуелната влада во Северна Македонија“, наведувајќи дека „недостатокот на целосна застапеност на Албанците во извршната власт претставува деформација на граѓанската волја во мултиетничка држава“.
Препорачано
Во интервју за косовскиот портал „Национале“, Таравари изјави дека сегашниот состав на владата не го одразува вистинскиот состав на Парламентот или општеството, посочувајќи дека огромното мнозинство од пратениците Албанци се во опозиција.
„Во земја каде што Албанците се државотворни, не можеме да имаме функционална влада без соодветно вклучување на нивните претставници. Пратениците се гласот на народот – не може да се тврди дека Албанците се претставени во Владата, кога огромното мнозинство од пратениците-Албанци се во опозиција“, рече Таравари.
Тој вели дека сегашниот модел на владеење ризикува продлабочување на етничките и политичките поделби во земјата, оставајќи ги Албанците на маргините на процесите на донесување одлуки, и покрај нивниот континуиран придонес во институционалниот живот на државата.
Таравари рече дека одлуката за напуштање на власта не била ниту спонтана ниту емотивна, туку е изградена врз основа на долга анализа на политичката состојба и однесувањето на довчерашните партнери.
„Кога нема почит кон граѓанинот кој гласал за вас, секој политички проект ја губи својата смисла. Она што го видовме во рамките на „Вреди“ беше политичка ароганција, а не рамноправно партнерство“, вели Таравари.
