Таравари распиша втор тендер за компресорска станица на Клинички, откако на првиот не се јави ниедна фирма
Министерот за здравство, Арбен Таравари, извести дека Министерството за здравство распишало втор тендер за набавка на станица за компримиран воздух во Клинички центар, откако на првиот не се пријави ниедна фирма и тој пропадна. Првичните рокови да се заврши со инсталација на новата компресорска станица беа до крајот на годинава, односно до декември, меѓутоа по пропаднатиот тендер е сè поизвесно дека ниедна фирма нема да стаса да ги заврши сите работи на време. Таравари вели дека ќе инсистира на брзина, но рок за финализација на проектот не даде.
Препорачано
– Ќе инсистираме што побрзо да се заврши со ова. Многу ни значи и за колегите што работат на хируршки клиники и за пациентите што побрзо компресорските станици и целиот систем да биде ставен во функција – рече тој.
Потсетен дека нема абер од ажурирањето на позитивната листа на лекови, односно дека позитивната листа нема добиено нов лек од 2015 година, тој вели дека уште се чека да се формира новиот Управен одбор на Фондот за здравство.
„Не е заглавен воопшто процесот, во постојана комуникација сме со Фондот за здравство. Чекаме да се формира управен одбор на Фондот за здравство. На првиот состанок на Управниот одбор, кога ќе биде избран, ќе поминат деветте лекови што се пратени од комисијата на Министерството за здравство. А јас ќе ги потпишам истиот ден и ќе го промовираме тоа“, вети Таравари.
Во меѓувреме хируршките клиники работат со надворешни компресори, а пациентите се лекуваат со оние лекови што ги има на позитивната листа или пак со тие што ќе ги купат од приватен џеб. На првиот тендер за компресорска станица не се јави ниедна фирма иако три отишле да го разгледаат просторот и да видат што точно треба да се менува, бидејќи се работи за многу комплексен тендер. Еден од условите на тендерот што пропадна беше фирмите да дојдат на лице место и да извршат увид на целата мрежа за компресорската станица.
Дел од хируршките сали на Клинички центар се исклучија од централната компресорска станица поради непријатен мирис за кој никогаш не се докажа од каде доаѓа. „Слободен печат“ откри дека едно од испитувањата на германската фирма „Дрегер“ покажало дека компримираниот воздух кој всушност е лек, воопшто не кореспондира со европскиот стандард, односно дека во компримираниот воздух што се користел кај пациентите имало зголемена влага и маслени пареи. Друго испитување кое Министерството за здравство не го споделува со јавноста, покажало дека во салите имало формалдехид.
