Уште пет лица кои беа повредени во пожарот во „Пулс“ и се лекуваат во странство, денеска ќе се вратат во земјава. Станува збор за четири лица кои се враќаат од Шпанија и едно од Грција.

Ова денеска го соопшти министерот за здравство, Арбен Таравари на прес-конференција.

-Добра вест е што се намалува бројот на пациенти што се лекуваат во странство. Во моментот се 113 пациенти, со тоа што вчера се врати еден пациент од Србија и една пациентка од Бугарија. Пациентите кои денеска се враќаат ќе бидат под 24-часовен надзор според протоколот, доколку конзилиумот од доктори одлучи дека треба да се пуштаат дома, ќе се пуштат на домашно лекување или ќе останат на лекување на некоја од клиниките. Најавени се уште 4 пациенти за враќање, но за тоа утре дополнително ќе информираме. До крајот на денот во странство ќе продолжат со лекување 108 пациенти. Се надевам дека до крајот на неделата ќе имаме уште поголем број пациенти што ќе се вратат – порача министерот Таравари.

Во моментот во болниците во државава се лекуваат 23 пациенти, од кои четири во Клинички центар (двајца на пластична хирургија и двајца на токсикологија), шест пациенти во Градска болница, осум во ГОБ 8 Септември, еден е подготвен за испис, а во Систина се четири пациенти. Сите овие пациенти се стабилни и во добра состојба.