
Таман помисливме има надеж: Опожарените шуми затрупани со ѓубре и градежен шут
Само десетина дена откако објавивме фотографии на кои се забележува дека опожарената шума во пехчевскиот дел на Малешевските Планини на некои места започнала да се обновува, од истата локација пристигнаа снимки на кои се гледаат купишта отпад кој несовесни граѓани почнале да го фрлаат на местата каде што беа пожарите.
Препорачано
Фотографиите, кои на својот фејсбук-профил ги објави планинарот и шумски полицаец Марјан Митриновски од вчерашната обиколка на опожарената шума во Пехчевско, покажуваат дека во дабовата и боровата шума, новите зелени фиданки се буквално затрупани со ѓубре, главно отпаден стиропор, градежен шут, но и друг вид ѓубре фрлено во шума.
– Ние не знаеме кој го фрла тој отпад во изгорената шума, но надлежните во локалната самоуправа имаат служби што можат тоа да го утврдат, бидејќи од снимките се гледа дека се работи за отпад од градежни активности, што може да укаже на можниот сторител – вели за „Слободен печат“ Глигор Пешначки, раководител на подружницата на ЈП „Национални шуми“ од Пехчево. Тој додава дека шумите во државна сопственост се во надлежност на „Национални шуми“, но не и собирањето отпад и гонењето на сторителите.
Од пехчевската подружница на „Национални шуми“ информираат и дека во делот од изгорените шумски предели, кои се во приватна сопственост, почнало расчистување на опожарената вегетација, додека за државните шуми сѐ уште се изготвува потребната документација, врз основа на која потоа ќе се сечат дрвјата и ќе се расчистува теренот. Овој процес му претходи на процесот на пошумување, кој Владата го најави уште во август, веднаш по пожарите што ја опустошија Малешевијата и предизвикаа значителни материјални штети.
– Очекуваме до крајот на годината да биде готов анексот на планот по кој ќе работиме на расчистувањето на теренот, но тоа е само почетокот на процесот на обнова на изгорената шума. Тоа е долготраен и мачен процес, кој може да трае околу две години, бидејќи треба да се исечат и отстранат сите остатоци од изгорената вегетација пред да се подготви теренот за повторно садење – вели Пешначки.
ФОТО: Нови фиданки – нова надеж за опожарените шуми во Пехчевско