Концертот на групата „Архангел“, со кој на 11 октомври беше отворена програмата на 22. издание на „Таксират фестивал“, на најубедлив можен начин ја покажа желбата на музичарите за настап во живо, но и страста на публиката за вистинските вредности.

Бележејќи 30 години постоење на „Архангел“, стиховите на Ристо Вртев создаваат чувство на безвременост. Стихови како „во овој свет без љубов сѐ ќе се претвори во смрт“ звучат и пророчки и предупредувачки во однос на ситуацијата во која, со пандемијата на коронавирусот, се наоѓа целото човештво.

Концертот ги разби дилемите дали да го очекуваме жестокиот рок-израз на песните на „Архангел“ од времето кога се создавани, или со срце да ги следиме новите аранжмани, кои на моменти влечат кон џез и свинг. Ударната тупаница, секако, е лириката и таа бескомпромисна потреба од љубов. Околу Вртев сега е собрана група врвни и талентирани музичари кои знаат како да се носат со величината на „Архангел“. Тоа го докажаа останувајќи на сцена повеќе од два часа и свирејќи го речиси целиот материјал на групата од сите периоди и албуми.

Тоа беше вечер за паметење и навистина е штета што со протоколите за културни настани во живо концертот можеше да го проследи лимитиран број публика. Но, енергијата на Вртев и на целата група дава надеж дека во блиска иднина ќе се создадат можности за нов звучен премин низ времето.

Фотографии: Таксират Фестивал / Соња Ставрова

(Текстот е објавен во „Културен печат“ број 53, во печатеното издание на „Слободен печат“ на 17-18 октомври 2020)