За сармата да испадне како онаа на вашите баби, треба навистина да сте вешти во кујната. Постојат неколку важни совети за сите оние кои сакаат без многу мака да го подготват ова омилено традиционално јадење.

Искусните домаќинки советуваат дека најдобро е да користите свежа зелка што сами сте ја киселиле – така ова јадење ќе има посебен вкус.

Друга важна ставка е месото. Некои готвачи велат дека само свинско влегува во сарма, а други тврдат дека најдобро е да користите мешано месо, односно комбинација од свинско и говедско. Би било добра идеја на месото да додадете парчиња свинска плешка и врат.

Што се однесува до оризот, непишаното правило вели дека треба да се динста пред да ги свиткате сармите, иако модерните домаќинки сè почесто само го потопуваат неколку минути во вода.

Кога ќе дојде време за редење на сармата, треба да се нареди во круг во тенџерето така што делот каде што е свиткана зелката оди на дното за да не се одвитка. Пред да ги наредите сармите на дното од тенџерето можете да ставите неколку листови зелка, за случајно да не ви се залепат сармите за дното.

И не заборавајте да оставите простор за малку чадено месо во средината на тенџерето, кое на јадењето ќе му даде прекрасна арома. Важно е сармата да се вари на тивок оган два до три часа и повремено да проверувате дали има доволно течност за да се свари оризот и да не се пресуши или загори сармата.