Претседателот на Демократската партија на Албанците, Мендух Тачи, вечерва соопшти дека тој и неговата партија повеќе не се дел од Коалицијата „Европски фронт“, предводена од ДУИ и Али Ахмети.

– Сто дена се малку за да се анализира работата на една Влада. Причината зошто отсуствував на прес-конференцијата организирана од „Европски фронт“ за стоте дена од владеењето на Владата е поради тоа што јас и ДПА веќе нема да бидеме дел од Фронтот – рече Тачи вечерва во гостување на ТВ Клан МК.

Денеска, пак, координаторот на пратеничката група на Европски фронт, Блерим Беџети, рече дека „коалицијата функционира во полн состав“, одговарајќи на новинарско прашање за наводите дека претседателот на ДПА и пратеник избран како член на коалицијата, Мендух Тачи, се повлекува од „Фронтот“.

Тачи и Ахмети со години беа непомирливи ривали во борбата за превласт во политичкиот блок на македонските Албанци, но во последните години ДПА стана маргинален играч на политичката сцена, а Тачи пред последните парламентарни избори одлучи да се приклучи кон „Европскиот фронт“ предводен од ДУИ.