Бранка Станковска е родена на 30 април 1931, во Скопје, таа беше македонска радио и ТВ водителка. Во Македонската радио-телевизија го поминала целиот работен век од 1948 – 1987 година. Нејзината најава на првиот телевизискиот пренос од Црн Врв на 5 јуни 1964 г. е почеток на програмата на ТВ Скопје, емитувана преку сопствената телевизиска мрежа. Неколку месеци подоцна на 14 декември Станковска ги читала вестите на првиот телевизиски „Весник“, заедно со Благоја Крстевски, што го означи почетокот на емитувањето на редовната програма на Македонската телевизија. Била една од најпознатите спикерки и водителки на малиот екран.

Бранка Станковска, доајенот на македонското спикерство и првата спикерка и водителка на Вестите на Радио телевизија Скопје, почина на 90-годишна возраст, на 21 јануари 2021 година.

-Тивко во сон си замина мојата баба Бранка Станковска. Дочека да биде и чукунбаба, имаше убав живот, изгледа внуци, правнуци и праправнука. Имам прекрасни спомени од неа, можеби затоа што бев прва внука па бев привилегирана од мала да поминувам повеќе време со неа. За работата што да напишам, беше вистински професионалец дури и по нејзиното пензионирање беше активна и сè уште може да се слушне нејзиниот глас на радио програмите, „точно е 12.00 часот“. Почивај во мир бабо и после многу години ќе се сретнеш со својата единствена и голема љубов, дедо Бошко“, напиша нејзината внука Ирина.

Од Бранка се простија и голем број на познати личности, како Весна Петрушевска, Игор Џамбазов, Зоки Бејбе и многу други.

Бранка Станковска засекогаш ќе остане великанот на радио и ТВ продукцијата, гласот на македонскиот литературен јазик.