Настасија Урбано во текот на 80-тите години била една од најбараните европски модели. Оваа дама неколкупати ги красела насловните страници на списанието „Вог“, како и на други престижни списанија, а бројните ангажмани ѝ ја отвориле вратата и за успех во Америка.

„Работев за сите списанија, сите ме сакаа. Заработив милион долари за една година, а работев само 20 дена таа година, и тоа се повтори три или четири години. Имав сè, живеев како кралица“, раскажала поранешната манекенка за шпанскиот „Ел Периодико“.

Настасија вели дека ја уништило запознавањето со маж кој подоцна ѝ станал нејзин сопруг, кој ја „исцедил“ до последна пара, а потоа едноставно си заминал… Денес таа истакнува дека нивните деца се единственото добро нешто што го добила во тој брак.

„Јас го финансирав нашиот животен стил, а тој ме остави само со облеката на мене. Сè плаќаше со моите пари. Само два дена откако го запознав, тој сакаше да купам БМВ, а јас, глупава, му потпишав чек. Бев заљубена“, раскажала Урбано.

Настасија била разочарана од својот поранешен сопруг до тој степен што целосно се скршила и страдала од депресија, а потоа започнале нејзините уште поголеми маки. Признала дека била исфрлена од становите од низа сопственици, со оглед на тоа што не можела да ја плати киријата на ниту еден од нив, па денес е осудена да талка од еден пријател до друг за да ѝ даде кауч барем за една ноќ. Кога не сака никого да вознемирува, ја поминува ноќта во куќичките за банки.

„Сакам моите деца да ме видат во поинакво светло. Сакам да се опоравам како личност, сакам да бидат горди на мене“, истакнала оваа 57-годишна жена.

Инаку, таа ја започнала својата кариера во Барселона и работела за бројни луксузни брендови, вклучувајќи ги „Ревлон“ и „Ив Сен Лоран“. Се дружела со Џек Николсон, Роман Полански и Енди Ворхол, а била и еден од гостите на свадбата на Мадона и Шон Пен.

 

View this post on Instagram

 

A post shared by Nastasia Urbano (@nastasiaurbano8)

Кога протече веста за моменталната состојба на некогаш познатата Настасија, група поранешни колеги и познаници решиле да сторат сè што е во нивна моќ за да ѝ помогнат повторно да застане на нозе.

„Никој не би помислил дека ова е можно. Кон нас се однесуваа како кон принцези, но кон неа се однесуваа како кон божица. Таа не го заслужува ова. Ќе ѝ помогнеме штом ќе разговараме со неа и ќе откриеме што ѝ треба“, рекла поранешната манекенка Рут Шулер, која ја памети Настасија како отворена, дарежлива личност.

Поранешниот колега на Настасија, Хернандо Херера, исто така се огласил и е убеден дека таа сè уште има што да му даде на светот на модата.

„Барам фотографи и агенции за да може повторно да работи и да живее нормално. Жал ми е што не знаев како стојат работите порано“, истакнал тој.