Првиот долгометражен игран филм со наслов „Диџеј Ахмет“ на македонскиот режисер Георги Унковски својата светска премиера ќе ја има на најзначајниот фестивал на независниот филм „Санденс“ во САД.

Светската премиера на филмот „Диџеј Ахмет“ ќе се случи на 23 јануари, на првиот ден од фестивалот „Санденс“. Филмот ќе биде прикажан како дел од главната меѓународна натпреварувачка категорија – World Dramatic Cinema, каде и ќе го започне својот живот. На фестивалот филмот ќе има шест јавни и три приватни проекции.

Првото прикажување ќе биде во легендарнoто „Египетско кино“ во градот Парк Сити, кое постои уште од 1920-ите години. На премиерата ќе присуствуваат продуцентите на филмот од повеќе земји, како и дел од главната авторска екипа.

Деталите за подготовката на филмот и за премиерата на „Санденс“ ги дознаваме од режисерот Георги Унковски.

Колку време помина од првичната идеја за филмот до премиерата и низ каков процес поминавте со неговата реализација?

– Од првичната идеја до премиерата ќе поминат речиси пет години, еден процес за кој јас сметам дека е предолг. Процесот беше „факултет“ сам по себе. Со овој филм вистински дознав што сѐ е потребно да се направи едно долгометражно филмско дело. Низ процесот се доведов до самата граница на моето знаење и значително се предизвикав надвор од својата комфор зона. Затоа и на крајот мислам дека колку и да беше мачен тој процес, имаме навистина опипливи резултати и филм со кој се гордееме.

Која е приказната на филмот?

– Филмот е кратко патешествие низ животот на еден тинејџер од Јуручките села близу Радовиш, кој покрај својата љубов кон музиката, се соочува со очекувањата на својот татко, грижата за својот помал брат и откривањето на љубовта со девојка, која е веќе ветена на друг.

Твојот краток филм „Налепница“, исто така, имаше премиера на „Санденс“, а потоа имаше многу успешен фестивалски живот. Што за еден филм значи да биде прикажан на „Санденс“?

– „Санденс“ е исклучително значаен фестивал кога е во прашање животот на еден филм. Фестивалот, покрај строгата селекција каде од преку 4.000 пријавени филмови „Диџеј Ахмет“ зема едно од десетте места во официјалната програма, ќе го издигне филмот (како и екипата која работеше на него) и ќе го стави во фокус на светската сцена. Немам сомнеж дека филмот ќе биде виден од илјадници луѓе и ќе има долг живот. Воедно, и тоа е најголемото значење на фестивалот и главната причина што за многу од нас, да се биде дел од „Санденс“, претставува остварување на еден животен сон.