Зголемување на ДДВ од 18 на 19 проценти и елиминирање на преференцијални стапки за оние производи и услуги кои не се неопходни, е една од мерките што ја предлага Светска банка е да се зголемат даночните приходи за да се обезбеди консолидација и фискален простор. Експертите од Светска банка денес го презентираа извештајот „Преглед на јавните финансии на Северна Македонија: Обезбедување на стабилност и поттикнување на отпорноста“.

Деновиве и бизнис-секторот излезе со предлог за зголемување на ДДВ. Пред почетокот на презентацијата на Извештајот, директорката на УЈП, Елена Петрова изјави дека сега не се размислува за зголемување на ДДВ.

– Ние работиме во рамките на политиките на Владата, фискалната стратегија, тоа се политики за одржување на ниски даночни стапки, а собирањето или мобилизацијата на даночните приходи треба да ја обезбедиме во тие услови на ниски даночни стапки со проширување на даночната база, со интегрирање на сивата економија во формалната економија и со разни други мерки коишто ќе се однесуваат на намалување на сите други даночни гафови, односно загуби на даночни приходи заради даночна евазија заради нецелосно и неточно плаќање на даноците –  рече Петрова.

Во извештајот на Свестска банка пишува дека „најновата стратегија со која фискалната нерамнотежа требаше да се намали со економскиот раст, не донесе задоволителни резултати“.

За зголемување на приходи, Светска банка предлага и зголемување на акциза за алкохол, зголемување на доаноци за цигари и воведување на данок за  шеќер и зашеќерени пијалаци, што е и согласно глобалните здравствени препораки.