Со презентација на камиони за собирање на отпад и нови контејнери на градскиот плоштад во Тетово, општината го промовираше почетокот на јавното-приватно партнерство со словенечката компанија Заубермахер, со која пред неколку месеци потпиша договор за собирање и транспортирање на комуналниот смет во Тетово. Преставникот на копанијата Ханс Рот вели дека решение на проблемот може да има, ако пристапот биде сеопфатен, а тоа го практикуваме во над 20 града во Европа.

„За мене е особено важно да го поддржам градот Тетово во воспоставувањето на еколошки систем за собирање отпад, да ја доведе Северна Македонија до европските еколошки стандарди и да им понуди на нашите клиенти најдобри совети и услуги. Имаме планирани многу активности, на пример, формирање центар за собирање отпад за граѓаните, поставување пунктови за собирање отпад, акционен план против неадкеватни места за отпад, подигање на свеста за правилно фрлање на отпадот во контејнери преку информативни кампањи во медиумите, поставување бесплатен еко-број каде што луѓето ќе можат да учат за ѓубрето, па дури и да обезбедиме информации на посебна апликација или веб-локација“, рече Рот.

Ќе има и втора фаза за селектирање на отпадот, а постојано ќе настојуваме да ја подигаме еколошката свест особено на младите, дополнија од странската компанија.

„Работата со децата во градинките и училиштата е исто така приоритет. Дури и најмалите треба да се едуцираат да можат да направат правилна селекција на отпадот и влијанието врз животната средина. Мислам дека ова е особено важно. И гледам во Австрија и во другите земји каде што сме активни колку децата се заинтересирани и ентузијасти да бидат вклучени. Во втора фаза ќе реализираме и пилот-проект за посебно собирање на органски отпад, хартија/картон и лесна амбалажа. Селектирањето е од суштинско значење за правилно рециклирање, рече Рот.

Градоначалникот на Тетово Билал Касами рече дека сите вработени во ЈКП Тетово кои биле ангажирани во Секторот „Комунална хигиена“ ќе ги презеде словенечката компанија, а сметот ќе се собира во сите села и населени места во рамките на Општина Тетово.

„Од почетокот на мандатот, ние сме ориентирани и посветени на најдобро, најефикасно управување, на одржлив и модерен систем за управување со отпад и сето тоа, за да имаме почиста животна средина. Затоа, еден од главните приоритети на нашиот ангажман беше спроведувањето на реформата за подобрување на управувањето со отпадот во нашата општина. На територијата на нашата општина има потреба од создавање основна инфраструктура за собирање, селекција, третман и преработка, како и депонирање на отпадот. Беше многу неопходно да се зајакнат обврските на сите актери во управувањето со отпадот, како и примената на принципите на циркуларна економија за минимизирање на отпадот и заштита на животната средина. Денеска ви претставуваме 8 модерни камиони за собирање смет, а поставивме и нови контејнери, заедно со упатства за граѓаните, кои значително ќе влијаат на чистотата на нашиот град. Нашата визија заедно со компанијата е да обезбедиме чист и развиен град за сите. Затоа, потребна е сечија соработка бидејќи само така можеме да дојдеме до заедничката цел што ја сакаме, а тоа значи модерно и ефикасно управување со отпадот“, рече Касами.

Во рамките на старото комунално претпријатие кое до денеска управуваше и со комуналниот смет ќе останат секторите „Паркови и зеленило“, „Јавна хигиена“ како и одделот „Православни гробишта“.

Секторот „Водовод и канализација“ исто така е одвоен од ЈКП Тетово, но тоа се уште функционира како јавно претпријатие.

ЈКП Тетово се децении е во долгови, а на вработените им доцнат платите. Општинските власти уверуваат дека со влез на странскиот капитал следува стабилизација на претпријатието, редовно земање на плати, но и редовна наплата на комуналните сметки.