Aктуелниот шампион на Македонија, Вардар 1961 без проблеми стигна до нова убедлива победа во Суперлигата.

Во првиот натпревар од 13. коло „црвено-црните“ го покажаа својот квалитет и славеа против Куманово со 37:21. Натпреварот се играше во малата сала во спортскиот центар „Јане Сандански“, а избраниците на Владо Недановски брзо го решија прашањето на победникот.

После десетина минути игра Вардар водеше со шест гола и во следните минути предноста за фаворитот само растеше, за на пауза црвено-црните да заминат со 23:8. Во преостанатиот дел од натпреварот беше отворено само прашањето со колкава разлика ќе слави Вардар.

Одличен во редовите на Вардар беше Ален Ќосевски кој постигна 12 голови, пет помалку постигна Савревски, а пет пати мрежата на Куманово ја погоди Чувара. Мрвовиќ беше најрасположен кај Куманово со десет гола.