Суперлига: Пролет подобар во градската пресметка со Голден Арт
Т. Пролет успешно ја стартуваше новата сезона откако во првото суперлигашко коло славеше на Голден Арт со резултат 23:27 на гостински терен.
Препорачано
Иван Џонов го постигна првиот гол за Т. Пролет во новата сезона, за почетно водство од 0:1, но веднаш потоа Голден Арт ја презеде контролата на резултатот одржувајќи минимална предност (3:2, 5:4).
Во првото полувреме се водеше израмнета битка во која Т. Пролет се врати во предност поведувајќи со 5:6, но ниту еден од тимовите не успеа да се одлепи на повеќе од еден гол разлика. На паузата Голден Арт со гол во последната секунда успеа да намали на 13:14.
Нападот на Т. Пролет подобро функционираше во второто полувреме, па гостинот стигна до водство од 18:21 и го натера домашниот тренер Матлиевски на тајмаут. Веќе во следниот напад Јагуриновски биеше прецизно, а Голден Арт само за момент успеа да се врати и намали на 20:22.
Тајмаутот на Лембанов ја врати сигурноста во играта на Т. Пролет, Василевски погоди во вистински момент, одбраната на чело со Петковски беше на висина на задачата до крајот на мечот, за победа и освојување на првите бодови во новата сезона.
Петковски беше одличен на голот на Т. Пролет со 13 одбрани, додека во нападот најефикасни беа Јагуриновски со шест, пред Палевски и Димов со по пет голови. На спротивната страна Илиев и Милегов по шестпати се запиша во листата на стрелците.
