Колумнистот Стефан-Андреас Касдорф од германскиот весник „Тагешпигел“ оцени дека израелскиот премиер Бенјамин Нетанјаху ги жртвува и Газа и израелските заложници што се држат таму и покрај сите ветувања и протести на нивните семејства.

Според него, премиерот сега се обидува дополнително да го изолира сопствениот народ, а ако Израелците го следат неговиот воинствен став, ќе го изберат патот на самоизолација.

Авторот истакнува дека Израел е веќе во голема мера сам на меѓународната сцена. Дури и долгогодишните сојузници почнуваат да губат трпение и доверба. Касдорф забележува дека личности како Доналд Трамп и Фридрих Мерц исто така се дистанцираат сè повеќе.

Сепак, Нетанјаху продолжува да врши притисок врз општеството. Тој тврди дека Израел мора да биде економски независен, самоодржлив, да произведува свое оружје и да стане „супер-Спарта“.

Касдорф нè потсетува дека Спарта сепак паднала.

„Нетанјаху не е кралот Леонидас, кој со триста Спартанци долго време им се спротивставуваше на илјадници Персијци кај Термопили“, истакнува колумнистот.

Според неговата проценка, израелскиот премиер дополнително ја влошува вонредната состојба во која се наоѓаат Израелците. Затоа, тој верува дека е време центристичките политичари во Израел да ги здружат силите со протестното граѓанско општество.