Иднината е „посветла“ за Северна Ирска со повторното воспоставување на владата која по две години застој сега конечно ќе добие проширена моќ, изјави вчера британскиот премиер Риши Сунак за време на посетата на Белфаст.

Мишел О’Нил од Шин Фејн беше назначена за прва министерка во саботата. Тоа беше првпат некој од редовите на ирските националисти да седне на тоа место, во историска пресвртница за тој дел од Обединетото Кралство.

Поделбата на власта во регионот беше клучен дел од мировниот договор од 1998 година, кој стави крај на децениското политичко и секташко насилство.

Владата на Сунак посредуваше во договорот со пробританската Демократска унионистичка партија (ДУП) за да се овозможи враќање на поделбата на власта со олеснување на трговските спорови по Брегзит.

„Сите работеа напорно за да дојдеме до овој момент, сите се посветени на тоа да функционира договорот за доброто на народот на Северна Ирска кои беа без својата деволирана влада предолго“, рече британскиот премиер Сунак.

Шин Фејн е поранешното политичко крило на Ирската републиканска армија (ИРА), која се залага од двете страни на ирската граница за крај на британското владеење во Северна Ирска и создавање на обединета Ирска.

О’Нил изјави за Скај дека „можеме да ја споделиме моќта, можеме да ја направиме стабилна, можеме да работиме заедно секој ден во однос на јавните услуги и во исто време да ги следиме нашите подеднакво легитимни аспирации“, рече таа.

Сунак, сепак, рече дека фокусот треба да биде на јавниот сервис и дека „сите се посветени на Договорот од Велики петок во Белфаст, но мислам дека сите се согласуваат дека сега е време да се фокусираме на решавање на секојдневните прашања што се важни за луѓето, за семејствата и бизниси во Северна Ирска“.

Сунак денеска треба да се сретне со О’Нил и со заменичката на ДУП, Ема Литл-Пенгали, соопшти неговиот кабинет.