
Судството е стигнато до критична точка: 40 препораки од Оценската мисија на ЕУ
Од 40-те препораки, за 17 не треба никакви измени, ниту уставни ниту законски, и тие би можеле да се спроведат во наредните месеци, но, како што вели амбасадорот Гир, ако успее Судскиот совет да ги усвои во следните месеци, тоа ќе биде „револуција“. Од овие 17 препораки, 10 се однесуваат на унапредувањето на судиите, а седум се за транспарентноста.
Вкупно 40 препораки има во извештајот на оценската мисија на Европската Унија за работата на Судскиот совет, информираше евроамбасадорот Дејвид Гир на брифинг со новинарите. Овие препораки се однесуваат на структурата и на компетентноста на Судскиот совет, на мандатот на членовите, на процената за селекција и именување, на дисциплинските постапки, на транспарентноста во комуникациите со јавноста, како и на финансирање на Советот.
Препорачано
Од 40-те препораки, за 17 не треба никакви измени, ниту уставни ниту законски, и тие би можеле да се спроведат во наредните месеци, но, како што вели амбасадорот Гир, ако успее Судскиот совет да ги усвои во следните месеци, тоа ќе биде „револуција“. Од овие 17 препораки, 10 се однесуваат на унапредувањето на судиите, а седум се за транспарентноста.
За другите 23 препораки потребни се уставни или законски измени. Тие се однесуваат на тоа кој треба да биде член на Судскиот совет, колку долго треба да биде учеството, на ризикот од долготрајно учество, на мерит-системот, на етичкиот кодекс, на процените за дисциплинска постапка против судиите, на буџетската автономија и на комуницирањето со јавноста.
На брифингот со новинарите не се одеше во детали на препораките, но беше кажано, на пример, дека шест години е предлог-мандат на судиите во Судскиот совет, па се препорачува тој да се скрати, бидејќи судиите предолго ќе бидат „оддалечени“ од судската практика.
Европската Унија, како што кажа Гир, очекува вклучување на овие препораки и мерки во политиката на судските реформи кои, пак, треба да бидат врвен приоритет и на идната влада.
Извештајот на оценската мисија Гир го оцени како добар, со сеопфатни препораки, но за нивното спроведување, рече дека е потребна политичка волја, инаку „како би се спроведувале реформите во судството“.
– Судството е стигнато до критична точка и реформите во тој сектор мора да продолжат – рече Гир.
Тој порача дека ако сакаме во ЕУ, неопходно е владеење на правото, бидејќи без тоа нема ни инвеститори. Или, едноставно кажано, реформите во судството не можат да се заобиколат за влез во ЕУ, а тоа, според него, домашните политичари добро го знаат.