Случајот на студентот Богдан Јовичиќ доби меѓународна димензија – Европскиот суд за човекови права во Стразбур прифати да го разгледа барањето поднесено од неговиот адвокат. Се очекува судот многу наскоро да одлучи за привремена мерка, пренесува Данас.

Судијата Петер Русма, во случајот „Јовичиќ против Србија“, денес испрати писмо до Богдан Јовичиќ, во кое го повикува да го прекине штрајкот со глад додека трае процесот на донесување одлука. Врз основа на овој повик, Јовичиќ го прекина штрајкот со глад.

Ова е првпат Европскиот суд за човекови права да разгледа таква апликација против Србија, иако сите правни лекови во земјата не се исцрпени.

„Судијата го повика Богдан да го прекине штрајкот со глад, и тој го стори тоа. Во суштина, судот во Стразбур го зеде случајот, назначи судија и почна да собира информации. Исто така, го повика Богдан да го прекине штрајкот. За прв пат во историјата, овој суд ќе одлучи за привремена мерка против Србија според член 39 од Деловникот, во врска со член 2 од Европската конвенција за човекови права“, изјави за Данас адвокатот на Богдан, кој вчера го поднесе барањето до судот.

Адвокатот сакаше да остане анонимен, наведувајќи дека не сака медиумско експонирање во овој случај.

Србија, како потписничка на Европската конвенција за човекови права и членка на Советот на Европа, е должна да почитува секоја мерка донесена од овој суд.

„Постојат ретки примери Европскиот суд за човекови права да одлучува без претходно да ги исцрпи сите домашни правни лекови. Самото прифаќање на барањето е голема победа, бидејќи дури 99 проценти од барањата се отфрлаат, дури и кога сите правни опции во земјата се исцрпени“, додаде адвокатот.