На судскиот процес за хакирање на телефоните на кралското семејство од страна на „Дејли Мирор“, се наведува дека и телефонот на принцезата Дијана бил хакиран од страна на таблоидот, во обид да добијат повеќе детали за нејзините тајни средби со комичарот Мајкл Баримор, пренесува „Гардијан“.

Имено, овој понеделник, Високиот суд во Лондон, слушна дека принцезата Дијана редовно разговарала со Баримор неколку месеци пред нејзината смрт, во време кога тие двајца беа едни од најпознатите луѓе во Британија. Телевизискиот водител Баримор во тој период беше актуелен поради својата сексуална ориентација, но и проблемите со зависноста од алкохол и дрога.

Во едно писмо, испратено на почетокот на 1997 година, принцезата му го дала својот телефонски број и напишала: „Драг Мајкл. Каква радост беше конечно да те сретнам вечерва. Сакав да нагласам дека сум тука за тебе во секое време. Многу е лесно сега да се видиме или да ми се јавиш на телефон, сега го имаш мојот број. Добро ти оди, верувај ми, знам. Многу љубов од Дијана“.

Месеци подоцна, се открива дека Дијана повторно му пишала, но овој пат дека е „уништена“ што „Дејли мирор“ ги добил деталите за нивните тајни состаноци. Таа му се извинила на актерот за протекувањето на информациите и го изразила своето незадоволство кон таблоидот.

На ова писмо, се наведува дека Мајкл Баримор не одговорил, изолирајќи се од упадот на новинарите на „Дејли Мирор“.

Адвокатот Дејвид Шерборн, кој го застапува помладиот син на Дијана, принцот Хари, во судскиот процес против весниците „Мирор груп Њуспејпр“, изјавил дека новинарите кои работат за „Дејли Мирор“ дефинитивно се виновни за хакирање на говорните пораки на принцезата.

Тој, исто така, сугерирал дека тогашниот уредник, Пирс Морган, бил неискрен кога во својата автобиографија напишал дека само „слушнал гласини“ за пријателство меѓу Дијана и Баримор.

Уредникот Морган реагирал на овие обвинувања и негирал дека свесно објавувал или користел податоци од наводното хакирање на телефонот на принцезата Дијана.

Инаку, наводите беа изнесени во тековниот судски процес против весникот „Дејли Мирор“, на кој требаше да сведочи и принцот Хари, кој сепак не се појави пред Високиот суд во Лондон, бидејќи присуствувал на роденденската забава на неговата ќерка Лилибет.

Се очекува принцот Хари да го започне своето сведочење во вторник.