Федерален судија привремено ја блокираше администрацијата на американскиот претседател Доналд Трамп за распоредување единици на Националната гарда во Орегон, вклучувајќи војници од Калифорнија, откако неколку државни гувернери го обвинија претседателот за неуставно користење на војската за политички цели.

Одлуката дојде откако околу 200 припадници на Калифорниската национална гарда, кои претходно беа распоредени во Лос Анџелес, беа префрлени во Портланд без претходна најава или согласност од федералните и локалните власти, објави АП.

Гувернерката на Орегон, Тина Котек, и гувернерот на Калифорнија, Гавин Њусом, изјавија дека немало формална комуникација со федералната влада и процениле дека нема потреба од воена интервенција.

„Нема немири во Портланд, нема закана за националната безбедност“, рече Котек.

Првично ограничената забрана за испраќање калифорниски војници во Орегон беше проширена откако до судот беа поднесени документи што покажуваат дека Пентагон планира да распореди до 400 припадници на Националната гарда од Тексас и Илиноис.

Главниот обвинител на Орегон, Ден Рејфилд, ја обвини администрацијата дека се обидува да ја „нормализира“ употребата на американската војска во градовите под контрола на демократите.

Гувернерот на Калифорнија, Њусом, го нарече распоредувањето „зачудувачка злоупотреба на законот и моќта“ и предупреди дека претседателот на САД ја користи војската како „политичко оружје против американскиот народ“.

Покрај Орегон, војници беа распоредени и во Илиноис, каде што гувернерот Џej Би Прикер рече дека ситуацијата не бара воена интервенција и дека се спротивставува на распоредувањето во никаков капацитет.

Тој исто така рече дека не бил однапред известен од федералните власти.

Трамп претходно ги означи Портланд и Чикаго како градови погодени од криминал и немири, но локалните лидери тврдат дека тоа е „политички мотивирана реторика“.