Во 19 коло од Првата македонска фудбалска лига (ПМФЛ) фудбалерите на Шкендија триумфираа на гостувањето кај Вардар со 2:1. По завршувањето на мечот ФК Шкендија остро реагираше на пристрасното судење на натпреварот против ФК Вардар.

– Одлуките на судиската тројка на чело со Игор Стојчевски директно влијаеја на текот на играта (со коректно судење многу рано ќе го затворевме натпреварот), фаворизирајќи го домашниот тим со двојни критериуми и неправедни одлуки. Од почетокот на натпреварот, судијата имаше едностран пристап, лесно казнувајќи ги нашите играчи и игнорирајќи ги фаулите против нас. Врвот беше достигнат во 64. минута, кога беше досуден сомнителен пенал за Вардар, а потоа неговото изведување беше повторено без чиста основа, иако нашиот голман ги почитуваше правилата. На крајот не беше досуден чист пенал во наша корист, што го потврди нефер пристапот на судиите – стои во објавата на ФК Шкендија.

Поради оваа причина, ФК Шкендија упати официјална реакција до Фудбалската федерација на Македонија и до надлежните органи, барајќи сериозен третман на ова прашање.

Судиската организација на ФФМ испрати одговор на реакција до ФК Шкендија:

Почитувани,

По добиениот писмен допис од Ваша страна, но и пред да го добиеме истиот ние како судиска организација и како комисија за делегирање на судии, а во координација со официјалните лица на натпреварите направивме анализа на одиграните натпревари, а посебен фокус е ставен кон дуелот Вардар – Шкендија (1:2).

Ние како надлежни тела на ФФМ, како судиска организација сме, исто така, сериозно загрижени за Ваквиот однос од Ваша страна. Фудбалот е спорт во кој треба стручните лица да ги решаваат спорните моменти, а не тоа да се прави со тенденциозни и намерни критики без притоа да се остави на надлежните органи да се справат со анализа на натпреварите.

Со овој допис, а по консултација со официјалните лица на споменатиот натпревар се донесени следните заклучоци:

1. Направен е ПРЕВИД во 65. минута на првиот помошник во моментот на повторувањето на ударот од белата точка за домашната екипа. Помошниот судија е оценет со слаба оценка 7.9 за судијата Слаѓан Марковски.

2. Нема офсајд за домашниот фудбалер кој со удар со глава ја погоди пречката при резултат 0:0.

3. Не постојат услови за казнен удар за гостинската екипа во 50. минута. Како прво дуелот на двата фудбалери е надвор од казнетиот простор, а како второ домашниот играч чисто ја отстранува опасноста во сопствениот казнен простор.

4. Сите доделени картони на двете страни се ИСПРАВНИ.

Воедно, ве информираме дека претседателот на комисијата за делегирање, Јосип Бартон јавно Ве прашува дали и за кои натпревари во минатото, Вие како клуб сте имале вакви или слични реакции до тогашните лица кои биле задолжени за работата на судиите. Вие како клуб во кој на јавни функции имате лица кои биле дел од поранешното раководство на ФФМ треба да знаете дека помина времето на „телефонско делегирање“ на арбитрите и „делегирање по нарачки“. За ова ќе се уверите и самите низ натпреварите кои ќе се одиграат во иднина, а самото воведување на ВАР – системот е доказ дека ова раководство на ФФМ и овој состав на судиската организација е за фер и коректно судење. Тоа е доказ за регуларност во лигата и заштита на клубовите кои за жал не постоеше во годините наназад и за тоа добро знаат и сигурно се добро информирани лицата кои се вработени во ФК Шкендија, а кои биле во блиска соработка со поранешното раководство на ФФМ и поранешниот комесар за делегирање на судии. За среќа на фудбалот таквите повеќе нема да имаат пристап до органите и телата на ФФМ.

Судиската комисија во рамки на ФФМ е изненадена од ваквиот пристап и реакција на ФК Шкендија од причина што односот на судиите и официјалните лица кон сите клубови од МФЛ е еднаков и професионален и не се сведува на навиките и постапките од претходниот период – Со почит, Судиска организација на ФФМ.