Голем број жители на стариот континент сметаат дека Русија ќе ја нападне Украина во 2022-ра година и веруваат дека НАТО и ЕУ треба да застанат на страната на Киев, вели студија чии автори сугерираат дека кризата може да заврши со драматична промена на начинот на кој Европејците ја гледаат својата безбедност, пишува Гардијан.

„Податоците алудираат на нешто како геополитичко будење во Европа“ вели Марк Леонард, директор на Европскиот совет за надворешни односи (ЕЦФР), кој ги направи анкетите од седум различни европски држави, покривајќи две третини од популацијата на ЕУ.

Земјите членки на ЕУ се покажаа како поделени, слаби и отсутни кога станува збор за кризата во Украина, но Европејците се обединети. Тие се согласуваат дека Владимир Путин може да преземе воена акција, а со тоа Европа, заедно со НАТО, треба да застанат на страна на Киев.

Анкетите, направени минатиот месец, покажаа дека мнозинството граѓани во шест од седумте држави веруваат дека Русија ќе ја нападне Украина во 2022-ра година, а најзагрижени за ова се земјите од Источна Европа.

Финска (44%) е единствена земја која се разликува од другите, како на пример Франција и Италија (51%), Германија (52%), Шведска (55%), Романија (64%) и Полска (73%) кои веруваат дека Русија ќе ја нападне Украина до крајот на годината.

Мнозинството во сите седум држави каде беа извршени анкетите веруваат дека НАТО и останатите 30 членки се главна одбранбена сила на украинската безбедност.

Во Финска, 56% од луѓето веруваат дека ЕУ ќе и помогне на Украина, а 59% веруваат во помошта на НАТО. Во останатите, бројките изнесуваат: 53% и 55% во Франција, 47% и 50% во Германија, 64% и 67% во Италија, 80% и 79% во Полска, 57% и 63% во Романија и 61% и 64% во Шведска.

Прашани кого му веруваат повеќе (ЕУ или НАТО) за да ги заштити Европејците од украинската криза, повеќе од 60% од луѓето од Полска, Шведска, Италија и Романија изјавија дека и веруваат на ЕУ. Во останатите две земји, односно Шведска и Финска, луѓето повеќе му веруваат на НАТО.

Довербата во Вашингтон

Довербата во Вашингтон, кој е подеднакво подготвен да им помогне на Европејците, е значително помала кај граѓаните. Покрај Полска и Романија, повеќето од нив веруваат дека Германија ќе им гарантира поголема безбедност отколку САД.

„Додека повеќето Европејци му веруваат на НАТО, алијансата повеќе не е име кое ги асоцира со САД. Имено, тие повеќе му веруваат на НАТО отколку на САД“ се пишува во студијата.

Што мислат Британците?

Покрај земјите од ЕУ, студијата контактираше и неколку Британци.

„И покрај јавната поддршка на Лондон за Киев, малку Британци гледаат некаква позначајна улога на Велика Британија во украинската криза“ се вели во студијата.

Само во Полска и Шведска луѓето сметаат дека Британија ќе има некаква улога во можниот конфликт.

Соочени со последиците

Студијата, исто така, покажа дека Европејците се подготвени да прифатат значителни, потенцијално долгорочни закани како резултат на одбраната на Украина, вклучително и можното пристигнување на голем број бегалци, повисоки трошоци за енергија, економска принуда, сајбер-напади и закана од руска воена акција.

Контактираните луѓе од Полска, Романија и Шведска сметаат дека одбраната на Украина е „исплатлив ризик“.

Но, Французите и Германците беа скептични на ова прашање.