Научниците долго време предупредуваат дека прекумерното консумирање алкохол му штети на срцето. Новата студија од Минхен сега покажува дека премногу пиење може да има загрижувачки последици за срцето и кај младите и кај здравите, јавува новинската агенција ДПА.

Кај повеќе учесници во истражувањето кои редовно оделе на забави се појавила аритмија.

– Клинички релевантните аритмии се појавиле кај повеќе од пет отсто инаку здрави учесници, и тоа главно во фазата на закрепнување – рекол Мориц Зинер од истражувачкиот тим на Универзитетската болница ЛМУ.

Истражувачите анализирале податоци од повеќе од 200 млади мажи и жени кои редовно излегуваат и консумираат повеќе алкохолни пијалаци. Во текот на студијата, тие постигнале максимални нивоа на алкохол во крвта до 2,5 промили.

Резултатите беа претставени во стручното списание „Еуропиан харт журнал“ (European Heart Journal).

Истражувачите го следеле срцевиот ритам на учесниците во студијата во период од 48 часа преку ЕКГ.

За тоа време, тие правеле разлика помеѓу состојбата пред консумирањето, фазата на пиење и фазата на закрепнување. Исто така, постоеле и две контролни фази. Внесувањето алкохол во текот на фазата на пиење доведувало до сè побрз пулс од повеќе од 100 отчукувања во минута.

Истражувачите заклучиле дека се чини дека алкохолот длабоко влијае врз работењето на срцето. Кои се долгорочните штетни ефекти на аритмијата предизвикана од алкохолот останува предмет на понатамошно истражување.

И други истражувања исто така ги потврдиле негативните ефекти врз срцето.

Студијата на Универзитетскиот центар за срце и крвни садови при Универзитетската болница Хамбург-Епендорф (УКЕ) од пред неколку години покажа дека дури и мали количини алкохол, кога се земаат редовно, можат да предизвикаат неправилно и забрзано чукање на срцето – и тоа кај здрави луѓе.