Екипата на Струмица денеска го започнува европскиот пат, македонскиот одбојкарски клуб денеска за противник ја има екипата на Нефтохимик Бургас од Бугарија во рамките од првото коло од квалификацискиот турнир ЦЕВ Лигата на шампионите.

Овој меч во спортската сала „Младост“ во Бургас ќе се игра од 19.00 часот по македонско време, 20.00 по локално.

Во групата, покрај Струмица и Нефтохимик Бургас, се и Фино Капошвар од Унгарија и Будванска ривиера од Црна Гора.

Пласман во втората фаза од квалификациите ќе обезбедат првопласираните две екипи.

Струмица за европските натпревари се засили со неколку странски одбојкари, тунискиот коректор Саад Ом Хени, неговиот сонародник Хамди Бен Талеб, како и Канаѓанецот Учена Офоха кој игра на позицијата среден блокер.

– Имавме проблем малку со странските засилувања кои се приклучија малку подоцна. Мислам дека имавме доволно време да го подготвиме тимот максимално за натпреварите во Лигата на шампионите. Ги анализиравме посебно ривалите, наше е да го дададе максимумот, да одиме на што повеќе победи. Сите што се тимот мора да функционираат заедно, мислам дека сè е во најдобар ред, нема нешто што би промениле – рече помошник тренерот на ОК Струмица, Атанас Милев.

Инаку одбојкарите на Струмица ја започнаа сезоната во домашниот шампионат со убедлива победа над ОК Универзитет Тетово со 3:0 во сетови 25:15, 25:11, 25:12.