Две Италијанки – врснички на возраст од 33 години, вчера биле фатени со цела залиха од разни видови дрога на граничниот премин „Табановце“, кога се обиделе да влезат во Македонија, соопшти полицијата.

Младите жени во автомобилот „рено“ носеле ЛСД, психоделични печурки, марихуана и „тврда кафеава материја“, а имале и семки од марихуана, велат од МВР.

„На 06.10.2025 во 20:20 часот на Граничен премин Табановце, на влез во државата, полициски службеници ги лишија од слобода Џ.П.(33) и Б.М.Р.(33), двете од Италија. При гранични проверки и контрола во возилото „рено“ со италијански национални ознаки, кое го управувала Џ.П., а сопатник била Б.М.Р., во личниот багаж на Џ.П. пронајдени се 186 семки од растението канабис, хемиска материја ЛСД, тврда кафеава материја и кесичка со суви печурки. Додека, во багажот на Б.М.Р. е пронајдена марихуана“, пишува во полициското соопштение.

Тие се задржани во полициска станица и по целосно документирање на случајот, против нив ќе биде поднесена соодветна пријава.