Трагедија на Црногорското крајбрежје. Едно лице го загуби животот, а тројца се повредени во инцидентот што се случи околу 18:00 часот во заливот Траште, близу Луштица, кај Тиват.

Според неофицијални информации, млад човек се удавил во големите бранови поттикнати од силниот ветер, а три лица се повредени – најверојатно кога брановите ги фрлиле на карпите на брегот, објави nova.rs.

Помош за повредените стигнала од екипата на Службата за вонредни ситуации од комплексот Луштица Беј, која и покрај многу тешките услови на море, успеала да го извади телото на удавениот.

За инцидентот била информирана и Управата за поморска безбедност и управување со пристаништа на Црна Гора (УПСУЛ), која ги координирала напорите на спасувачките служби.

Инаку, УПСУЛ денеска имаше дури пет акции за спасување на капачите на плажата Велика во Улцињ, чии животи беа загрозени поради невнимание и непочитување на црвените знамиња кои беа истакнати на плажите за капачите поради опасноста предизвикана од големите бранови и силниот ветер, пишува Вијести.