Страшна несреќа во Мали Лошињ: Рампата на траектот паднала врз морнарите, тројца загинале
Денеска околу 15 часот и 10 минути полицијата добила дојава дека на брегот во Мали Лошињ, Хрватска, загинале три лица, а едно лице е повредено.
Препорачано
На местото на настанот се води истрага, предводена од заменик жупанискиот – државен правобранител од Риека.
Во расветлувањето на овој настан, заедно со полицијата, учествуваат и други надлежни служби, за да се утврдат околностите кои довеле до страдањето и да се утврдат сите релевантни факти, пренесува „Н1“.
„Според првите информации што ги имаме, при работа на траектот Јадролинија Ластово во Мали Лошињ, денеска во попладневните часови се случила несреќа во која загинале тројца членови на екипажот на Јадролинија, додека четвртиот е тешко повреден“, соопштија од Министерството за море, транспорт и инфраструктура.
„Најпрво сакаме да го изразиме нашето жалење за оваа страшна несреќа и нашето сочувство до семејствата на загинатите и да се надеваме на оздравување на повредениот член на екипажот“, се додава во реакцијата.
На местото на несреќата покрај другите служби има и вработени во надлежната Капетанија на пристаништа кои ќе спроведат истрага за причините за оваа несреќа и вработени во Агенцијата за истражување на несреќи во воздухопловство, поморскиот сообраќај и железницата.
„Уште еднаш изразуваме сочувство за оваа страшна несреќа и ќе ја информираме јавноста за сите нови информации и причини за несреќата, како и за резултатите од истрагата“, се вели во соопштението.
Јадролинија се огласи со соопштение во кое известува за несреќата и изразува сочувство до семејствата на загинатите морнари.
„Изразуваме искрено сочувство до семејствата на загинатите морнари, Јадролинија е длабоко потресена од овој немил настан“, се вели меѓу другото во соопштението.
„Ластово е траект за локални линии, класифициран како Ро-ро патнички брод. Изграден е во 1969 година во Јапонија, каде што пловел под името Ишизучи. Во 1978 година, бродот стана дел од флотата на Јадролинија. Најчесто плови по линиите на сплитскиот регион“, пишува на страниците на Јадролинија. Долг е 72,7 метри и широк 13,7 метри.
