Со присуство на политички и воени делегации од Грција и Србија, во кои беа и министрите во српската влада, Милица Ѓурѓевиќ Стаменковски и Братислав Гашиќ, пред црквата „Св. Илија“ на врвот Кајмакчалан на планината Ниџе, на македонска територија, викендов се одбележуваше годишнина од битката на Кајмакчалан во Првата светска војна.

За настанот, српските министри објавија цели пропагандни патриотски видеа на социјалните мрежи, од кои речиси и да не може да се открие дека настанот се случил во Македонија. Македонското знаме, на пример, се гледа само во две секунди од монтирано видео што го сподели Ѓурѓевиќ Стаменковски, српската министерка за труд и социјална политика.

Фотографии од одбележувањето на Кајмакчалан објави и вицепремиерот за односи со заедниците во македонската влада, Иван Стоилковиќ, кој се сликал со српските министри. Тој заедно со фотографиите објави и пригодна српска патриотска порака.

На Кајмакчалан во септември 1916 година се воделе тешки борби меѓу бугарската армија од една страна и француската и српската војска од друга страна, а битката се смета за една од најважните на Македонскиот фронт, познат и како Солунски. Во неа загинале илјадници војници од двете страни. Многумина од учесниците во битката и од загинатите во неа биле Македонци од Мариово и од Егејска Македонија, присилно регрутирани и од Бугарите и од Србите.