Неодамна од печат излезе изборот драми на познатиот српски прозаист и драматичар Милош Латиновиќ со наслов „Лида Барова и други драми“. Во книгата се застапени драмите: „Лида Барова“, „Бардо“, „Случајот Пазолини“, „Маерлинг, или кој го напишал бре ова…“ и „Крвта на црвениот петел“.

„Кога ќе ја погледнете оваа збирка драми, низ умот ви прелетува една мисла, а тоа е: дали во овие ископани вистини лежи манипулацијата на човекот и зошто историската неправда секогаш мора да биде свиткана во обландата на постхумната слава.

Овие драмски дела ќе ги препознаеме токму по констелацијата и по стилската оригиналност на еден автор кој знае да ја испрати репликата на вистинското место и да го помести драмското дејствие во сосема неочекуван правец понудувајќи ни дури и факти што дотогаш не сме ги знаеле. Затоа би рекле дека историјата во овие пет драми е слугинка што на овој автор му го донесува она што му треба, а потоа си заминува молчешкум свиткувајќи си го грбот пред неговата писателска интерпретација.“

Драмите на Милош Латиновиќ се во издание на „Перун Артис“ од Битола и во превод на Сашо Огненовски.

(Текстот е објавен во „Културен печат“ број 258, во печатеното издание на весникот „Слободен печат“ на 30.11.-01.12.2024)