Филмскиот продуцент Аурелио Де Лаурентис, кој е многу попознат во фудбалските кругови како сопственик на Наполи, проговори за најактуелната тема по освојувањето на четвртиот Скудето во историјата на клубот.

Станува збор за белгискиот плејмејкер Кевин Де Брујне (33), кој го заврши деветгодишниот престој во Манчестер сити, а според шпекулациите, би можел да стане новата „десетка“ на Наполи.

„Знам дека купи прекрасна вила. Утрово зборував со него, беа тука и неговата сопруга и синот“, откри Де Лаурентис, пренесува реномираниот новинар Џанлука Ди Марцио.

Сопственикот на Наполи нагласи дека засега сè уште нема ништо официјално, но потврди дека преговорите се во напредна фаза.

„Сè додека не биде сè официјализирано и потпишано, не можеме ништо да кажеме со сигурност“, додаде Де Лаурентис.

Фановите на Наполи, освен евентуалниот трансфер на Де Брујне, ги интересира и иднината на стратегот Антонио Конте, кој се смета за креатор на новиот успех на клубот.

„Тренерите имаат договори, и доколку сакаат да останат, ние  ќе сме пресреќни“, истакна првиот човек на Наполи.