Фудбалскиот клуб Арсенал денеска објави дека играчите Жоржињо и Киран Тирни си заминуваат од „Емирати“ на 30 јуни по истекот на нивните договори, додека Рахим Стерлинг ќе се врати во Челси по едногодишна позајмица.

Како што е наведено на веб-страницата на клубот, покрај Жоржињо, Тирни и Стерлинг, и голманот Нето нема да игра за Арсенал следната сезона, односно после позајмицата се враќа во Борнмут.

– Сакаме да им се заблагодариме на сите играчи кои нè напуштаат, за нивниот придонес во клубот. Секогаш ќе бидете дел од семејството на Арсенал и ви посакуваме сè најдобро, здравје и среќа во иднина – соопшти клубот на својата веб-страница.

Според британските медиуми, Жоржињо ќе потпише за бразилскиот тим Фламенго, а Тирни ќе се врати во Селтик. Стерлинг не постигна ниту еден гол за Арсенал оваа сезона, додека Нето одигра еден меч во сите натпреварувања.

Арсенал ја заврши сезоната на второто место на табелата во Премиер лигата, а во Лигата на шампионите беше елиминиран во полуфиналето од Пари Сен Жермен.