Младиот и перспективен десен бек Урош Митровиќ (20) во иднина ќе биде член на ракометниот клуб Вардар 1961. Доаѓа од екипата на Тулуз во Франција, а зад себе има и интернационална кариера во Полска и Австрија. Во Вардар треба да остане најмалку до јуни 2027 година.

Леворакиот Митровиќ е репрезентативец на Србија и настапуваше и во квалификациите за Европското првенство во 2026 година. Настапуваше и за младинските селекции на Србија. Во моментов е дел од тимот на Тулуз, а играше и во Лига Европа каде екипата стигна до главната фаза.

Пред да замине за Франција, една сезона беше во Австрија во екипата на Брегенц, и една година во Висла Плоцк во Полска. Во Србија го носеше дресот на Врбас и на Црвенка.

Сезонава играше на вкупно 39 натпревари во различни категории (клуб и репрезентација) и постигна 34 голови.

– Голема чест и задоволство да играм во боите на македонскиот гигант, клуб кој зад себе има неверојатна историја. Во наредните сезони со нетрпение очекувам да го дадам својот максимум и да го покажам сето она на што сум способен на теренот, и заедно со екипата да се претставиме во најдобро светло – изјави Митровиќ.