Поштата на Србија и Поштата на Унгарија потпишаа договор за размена на пакети во меѓународниот поштенски сообраќај со цел подобрување на условите за онлајн-купување. Договорот го потпишаа в.д. директорот на Поштата на Србија, Зоран Анѓелковиќ и заменик-директорот на поштата на Унгарија, Виктор Кохут, објави Бета.

Анѓелковиќ изјави дека со овој договор Поштата на Србија и Поштата на Унгарија станаа овластени оператори за меѓусебно прифаќање на пакетите, со што ќе се подобрат условите за онлајн-купување. Според него, потпишувањето на овој договор значително ќе ги подобри трговските односи меѓу Унгарија и Србија.

Од појавувањето на апликацијата „Тему“ има зголемување на пратките за 30 проценти, а во август се очекува тој број дополнително да се зголеми за 20 проценти. Се проценува дека до крајот на годината само преку „Тему“ ќе бидат примени пет милиони пакети.

„Унгарија има договор со оваа компанија, така што ќе се олесни примањето на пратките“, рече Анѓелковиќ.

Анѓелковиќ додаде дека овој договор ќе значи зголемување на приходите за двете компании, како и дека ова е придонес за договорот за соработка меѓу српскиот претседател Александар Вучиќ и унгарскиот премиер Виктор Орбан. Тој најави дека во наредниот период ќе се зголеми бројот на пратки низ Србија од 500 на 1.000, со цел да се намали товарот на доставувачите, како и дека се планира формирање нов логистички центар за прием на пратки во Суботица. Како што рече Анѓелковиќ, овие измени ќе го намалат товарот на доставувачот и ќе го забрзаат процесот на испорака на пакетите. Тој посочи дека Поштата Србија е најважниот дистрибутер на пратки од онлајн-трговија во земјава и дека во последните месец и половина бележи голем скок во сите услуги за пратки и пост-експрес.