После стартниот пораз од Португалија во Матошинос, денеска од 18.00 часот (пренос на „Спортклуб“ 1 ХД) во својот втор натпревар најдобрата македонска женска кошаркарска репрезентација во СРЦ „Кале“ ќе игра против фаворитот Србија.

Кошаркарките предводени од селекторот Александар Ашаданов ќе имаат веројатно и ретка можност во своите кариери, да играат против една од најдобрите европски селекции во изминатата деценија.

Србија на стартот од квалификациската група „Г“ за учество на Европското првенство во 2025 година имаше убедлива победа од 82:40 против репрезентацијата на Украина.

– Очекувам еден многу тежок натпревар, бидејќи сите знаеме каква екипа имаат Србија и каде рангираат во женската кошарка во светот. Тие се апсолутни фаворити и таа улога им ја препуштаме без никакво размислување и со голем респект кон нив. Но, тоа не значи дека ние ќе излеземе на терен исплашени, и без желба за докажување и играње против тие девојки. Ќе дадеме максимум да се покажеме во најдобро светло, и оставиме една слика која ќе ни биде мотив за сите идни заеднички собири и натпревари – вели една од најискусните македонски репрезентативки, Нена Трајчевска.

Квалификации за Евробаскет-жени 2025

Група „Г“

Двојки, второ коло

Денеска
17.00 часот: Украина – Португалија
18.00 часот: Македонија – Србија

Табела

1.Србија 1 1 0 82:40 2 бодови
2.Португалија 1 1 0 65:52 2
3.Македонија 1 0 1 52:65 1
4.Украина 1 0 1 40:82 1