Кога некојa спортска надеж во Македонија зема замав во краток период, треба сериозно да се обрне внимание, како од нас медиумите, така и од институциите кои треба да им помагаат на спортистите, да се вложува во нив и да им се дава мотив и уште поголема волја да продолжат надевајќи се по истиот успешен пат.

Кога сме кај борењето, последен пример за врвен успех беше Владимир Егоров (26) кој стана европски шампион, борачот на БК „Балканец“ – Штип.

Прочитајте повеќе: Балканскиот шампион во борење, Георгиев: Да се верува во себе, со макотрпна работа до успех

А ние како веб издание продолжуваме да ги промовираме младите македонски спортисти кои даваат сè од себе да ја претстават нашата земја во најдобро светло, помеѓу нив е и членот на боречкиот клуб „Вардар“, Марија Спирковска (18), голема надеж во борењето, која лани се закити со два златни медали од Балканското и Медитеранско првенство во Ксанти, Грција.

Како дел од нејзините успеси, годинава има прво место на изборните првенства во Радовиш (сениорки) и во Прилеп (јуниорки), златен медал на државното првенство за У23 во Штип и на кое боречкиот клуб „Вардар“ беше убедливо најдобар во женска конкуренција.

Како и секој спорт, така и борењето треба да се третира на најдобар можен начин, да се реализираат основните цели на еден натпреварувач, да биде среќен и задоволен што го исполнува денот со потребните услови, тргнувајќи од тренинзите.

Спирковска во нашиот разговор кажа дека за добар резултат е потребен добар тренер, напорна работа, правилна исхрана, но и добри услови и спаринг партнери кои таа ги нема. И нејзиниот тренер Чедо Николовски ни изјави дека за жал се нема никакви услови.

Кога и каде започна да тренираш борење?

– Со борење се занимавам четири години и тренирам во боречкиот клуб „Вардар“.

Што претставува за тебе борењето?

– Борењето за мене претставува мое поле во кое можам да се искажам.

Освои седмо место на Европското првенство во Пловдив (до 23 години) во категорија до 50 кг. Колку за тебе значи ова искуство да се настапи на едно големо натпреварување пред следните предизвици?

– Учеството на ова Европското првенатво ми донесе големо искуство и едноставно чувството е прекрасно да се осети амбиентот на еден ваков голем настан. Сепак ова првенство беше до 23 години, а јас настапив со неполни 18 години.

Кои се твоите омилени досегашни успеси на домашната и меѓународната сцена?

– Омилени успеси досега ми се Балканското првество и Медитеранските игри за борење на кој и на двете станав прва минатата година. А на домашна сцена досега сум осум пати прва на државно од пионерска, па сè до сениорска конкуренција.

Кои се твоите следни активности за оваа година со боречкиот клуб „Вардар“?

– Следните активности ми се Европското и Светското до 20 години и Светското првенство до 23 години.

Која е вашата најголема поддршка на патот кон успесите?

– Најголема поддршка на патот кон успесите ми се моето семејство, клубот во кој што тренирам и мојот тренер Чедо Николовски.

Што е потребно за еден борач, воопшто спортист за да верува во добар резултат?

– За еден борач да постигне добар резултат пред сè е потребно добар тренер, кој ќе му го пружи целото негово знаење, добри услови кои јас ги немам, напорна работа, правилна исхрана и добри спаринг партнери кои јас ги немам.