Американскиот претседател Доналд Трамп ќе пристигне во замокот Виндзор во среда, каде што ќе биде пречекан со церемонијално добредојде од кралот Чарлс III и целото кралско семејство. Посетата, полна со помпезност и протокол, вклучува воени оркестри, кралски кочии и државна вечера, а Велика Британија ја користи за дополнително зајакнување на дипломатските врски со Америка.

Односот на Доналд Трамп со кралското семејство датира од 1980-тите, кога тогашниот принц од Велс, сега крал Чарлс III, беше негов гостин во Мар-а-Лаго. Сега, по децении фасцинација од кралскиот сјај, американскиот претседател ужива во врвот на протоколарното гостопримство. „Никој не може да направи шоу како вас“, рече тој за време на неодамнешната посета на Шкотска.

По пристигнувањето во Виндзор, Трамп и првата дама Меланија ќе бидат пречекани од принцот Вилијам и Кејт Мидлтон, по што ќе следи средба со кралот и кралицата Камила, посета на воените трупи, обиколка на кралската колекција и положување венец на гробот на кралицата Елизабета II. Главниот настан ќе биде раскошна државна вечера, додека Меланија Трамп ќе има посебен распоред, каде што ќе ѝ се придружат Камила и Кејт Мидлтон.

Иако политичките дискусии со кралското семејство се забранети, работниот дел од посетата е закажан за четврток, кога Трамп и премиерот Кир Стармер ќе одржат разговори во резиденцијата Чекерс. Се очекуваат големи технолошки инвестиции и потврда за нови трговски договори, но разликите околу санкциите кон Русија и ставот за војната во Украина остануваат видливи.

Восхитот на Трамп кон британската монархија датира од неговото детство, а средбата со покојната кралица Елизабета Втора за време на неговиот прв мандат ја опиша како личен белег. Сега, во неговиот втор мандат, посетата носи и силна дипломатска симболика. „Јас сум голем обожавател на кралот Чарлс“, рече тој неодамна.

Посетата, сепак е засенета и од нов скандал – оставката на британскиот амбасадор во Вашингтон, Питер Манделсон, поради неговите врски со Џефри Епстин. Случајот го ослабна премиерот Стармер, кој сега е домаќин на Трамп под притисок од домашната десница и високите очекувања на јавноста.

Дали раскошната позадина на замокот Виндзор ќе му помогне на Стармер да го подобри својот имиџ или дополнително да ја искомплицира неговата позиција, ќе биде откриено во наредните денови. Едно е сигурно засега – Трамп ужива во моментите во кои британската монархија му дава еден вид печат на признание.