Советска вселенска сонда денес влезе во атмосферата на Земјата, повеќе од 50 години по нејзината неуспешна мисија на Венера. Сондата Космос 482, лансирана во 1972 година, се урна во Индискиот Океан откако помина повеќе од пет децении во орбитата.

Падот на Космос 482 ја истакнува долготрајноста на вселенскиот отпад и важноста на следењето на неактивните сателити, пишува Newsweek. Експертите забележуваат дека иако ваквите настани се ретки, тие покажуваат потреба од претпазливост при следење на објектите во орбитата на Земјата.

Заробена во орбитата

Космос 482 беше дел од советската програма „Венера“ помеѓу 1961 и 1984 година со цел проучување на Венера. Сепак, поради дефект на лансирното возило, не успеа да ја напушти Земјината орбита и остана заробена во елиптична орбита од март 1972 година. Како што пишува британски „Индепендент“, сондата имала облик на сфера со дијаметар од околу 1 метар. Тежела приближно 500 кг и била изградена да издржи екстремни притисоци и температури.

Нејзиниот пад не бил набљудуван, а точното време и локација на падот беа неизвесни сè до потврдата за нејзиното спуштање во Индискиот Океан. Агенции како што е Европската вселенска агенција (ЕСА) ја следеа сондата, предвидувајќи временска рамка на падот помеѓу 9 и 11 мај.

Пред тоа, ЕСА, која го следеше неконтролираниот пад на вселенското летало, објави дека последен пат е забележана од радар над Германија, објави NBC News. До утрово, американската вселенска команда не го потврди падот на сондата додека собираше и анализираше податоци од орбитата, објави Associated Press.

Научникот од Универзитетот во Колорадо, Болдер, Марчин Пилински, изјави: „Иако можеме да очекуваме поголемиот дел од овој објект да не изгори во атмосферата за време на повторното влегување, тој би можел сериозно да се оштети при ударот. Веројатноста да удри во населено подрачје е бесконечно мала.“

Остатоците ќе и припаднат на Русија

Блог во живо од Канцеларијата за вселенски отпад на ЕСА објави: „Сателити и делови од ракети со средна големина повторно влегуваат во атмосферата речиси секојдневно, додека помалите следени вселенски отпади влегуваат уште почесто. Парчињата што не беа уништени многу ретко предизвикуваа штета на земјата. Со зголемувањето на вселенскиот сообраќај, очекуваме фреквенцијата на повторно влегување во атмосферата дополнително да се зголеми во иднина.“

На прашањето дали вселенскиот отпад може да предизвика повреда, блогот на ESA наведува: „Ризикот од какво било повторно влегување во атмосферата што предизвикува повреда е исклучително мал. Годишниот ризик поединец да биде повреден од вселенски отпад е помал од 1 на 100 милијарди. За споредба, едно лице има околу 65.000 пати поголема веројатност да биде погодено од гром.“

Сите делови од Космос 482 што не беа уништени ќе ѝ припаѓаат на Русија, според договорот на Обединетите нации.