Советот за безбедност на Обединетите нации ќе се состане утре за да разговара за упадите со беспилотни летала во полскиот воздушен простор, што полскиот претседател Карол Навроцки го опиша како обид на Русија да го тестира одговорот на Варшава и НАТО, објави Ројтерс.

Состанокот на Советот за безбедност на ОН беше свикан на барање на Словенија, Данска, Грција, Франција и Велика Британија.

Полски борбени авиони Ф-16, холандски Ф-35, италијански авиони за надзор АВАКС и авиони за полнење гориво на НАТО учествуваа во операција за соборување беспилотни летала во полскиот воздушен простор во текот на ноќта меѓу 9 и 10 септември, кои дојдоа од правец на Украина и Белорусија, соопштија претходно официјални лица.

Полскиот министер за одбрана Владислав Косињак-Камиш изјави во парламентот на земјата дека досега се пронајдени остатоци од 16 беспилотни летала, како и дека полската логистичка поддршка за Украина во војната против Русија можеби била мотивација за упадите.

Вчера, НАТО го активираше Член 4 од Северноатлантскиот договор, според кој членовите на алијансата можат да побараат консултации со своите сојузници, доколку се заклучи дека нивниот „територијален интегритет, политичка независност или безбедност“ е загрозен.