Мнозинството членови на Советот на јавни обвинители застанаа зад републичкиот јавен обвинител Љупчо Коцевски и дадоа негативно мислење за предлогот на Владата за негово разрешување. Шестмина членови на Советот, меѓу кои и претседателката Душица Димитриеска, беа против разрешувањето на Коцевски, а тројца членови – Кети Петкова, Ардиан Демири и Марјана Илиеска – крeнаа рака „за“ разрешување на јавниот обвинител.

Биографијата на струшкиот адвокат Демири, еден од поновите членови на Советот, и пред да биде изгласан, во јавноста беше спорен поради неговата фотографија со лидерот на Демократското движење Изет Меџити, кој е дел од владејачката коалиција Вреди.

По написите, предлогот за Демири беше повлечен, но потоа сепак беше избран и стана член на Советот. Петкова, пак, беше единствената која пред околу пет месеци гласаше против суспензијата на поранешниот шеф на вишото јавно обвинителство Мустафа Хајрулахи, кога се водеше „војна“ меѓу Коцевски и Хајрулахи, кога си поднесуваа кривични еден на друг.

Овие членови се избрани на предлог на Собранието, додека Илиеска стана нов член на Советот во летото 2024-та и доаѓа од прилепското јавно обвинителство.

Додека за предлогот за разрешување имаше и за и против, членовите на Советот беа едногласни да се исклучи јавноста од расправата за предлогот, па така новинарите не ја следеа полчасовната расправа за да слушнат кој член какво мислење има за разрешување на Коцевски. Предлогот за исклучување на јавноста дојде од Зорица Павловиќ, која се повика на членот 10 од Законот за совет на јавни обвинители. Се надоврза и членката Светлана Жупановска, според која јавноста треба да се исклучи заради сензитивноста на ситуацијата по трагедијата во Кочани и заштита на угледот и интегритетот на јавниот обвинител.

– Уште повеќе, обвинителот во одговорот изнесува податоци и информации и прилози што се поврзани со дисциплинската постапка спрема двајца јавни обвинители – рече Жупановска.

Седницата на која се гласаше за разрешувањето се одржа по две одложувања. Првично беше закажана на 18 март, но беше одложена поради трагедијата во Кочани. Советот не заседаваше ниту на 26 март, бидејќи немаше кворум.

Владата ја почна постапката за разрешување на Коцевски во февруари по низата критики за работењето на Коцевски, кој пак тврдеше дека не сторил никаква дисциплинска повреда за да биде разрешен. Работите се сменија по трагедија во Кочани. Уште првиот ден се појави Коцевски, заедно со раководителите на другите обвинителства, Ислам Абази и Гаврил Бубевски кои исто така беа мета на критики на власта. Тогаш Мицкоски ја пофали работата на обвинителите.

– Во овој момент имајќи ја предвид чувствителната ситуација во општеството, планираме таа постапка да ја застанеме таму каде што се наоѓа, затоа што цениме дека обвинителите што работат посебно на случајот што се случи во Кочани, треба да работат и да сработат, да им дадеме шанса да сработат. Јас кога кажав дека сме задоволни, впрочем можев да видам дека постои една заедничка акција и работа помеѓу МВР и Јавното обвинителство што резултираше со 34 обезбедени лица што имаат и најмал сомнеж за поврзаност со овој случај – рече Мицкоски.

Од Владата потоа објаснија дека тие ќе го чекаат мислењето на Советот на јавни обвинители, но дека предлогот за разрешување на Коцевски нема да го достават во Собрание каде власта има мнозинство за негово разрешување. Откако ги пофали, Мицкоски потоа кажа дека одлуката Коцевски да не биде разрешен не е трајна. Коментирајќи ги критиките на СДСМ и ДУИ за тоа како се води истрагата за трагедијата во Кочани, односно дека таа е селективна, тој остави можност владата да се премисли.

Од Владата за „Слободен печат“ потврдија дека нема рок кога предлогот може да биде испратен во Собрание.

– Во согласност со закон, Владата нема рок во кој треба да го испрати мислењето – велат од Владата, со што се остава можност Владата ако одлучи, да го докрајчи разрешувањето на Коцевски.

Според Законот за јавно обвинителство, позитивното или негативното мислење не е обврзувачко за Владата.