Градоначалникот на Кочани, Венко Крстевски вели дека советникот кој вчера удри со шише вработена во општина Кочани, мора правно да одговара. Тој во изјава за телевизија 24 додава дека постоечкиот Совет е цивилизациски пораз за Кочани.

„Според мене Акиов треба да ѝ се извини на Ана. Да сноси правна одговрност и да сноси последици, вели Крстевски.

За време на вчерашната седница на Советот на општина Кочани се случи инцидент меѓу советникот од Партијата за демократски просперитет на Ромите, Аки Акиов и советникот Васе Алексов од ВМРО-ДПМНЕ, при што Акиов, најверојатно сакајќи да го погоди Алексов, со шише удри вработена во општината. Градоначалникот Крстески и други советници спречија поголем инцидент, држејќи го Акиов да не дојде до Алексов.

По инцидентот, СДСМ и ВМРО-ДПМНЕ се обвинуваа меѓусебно и побараа одговорност за настанот.

СДСМ и ВМРО-ДПМНЕ се препукуваат за инцидентот во Општина Кочани

Се огласија и од Партијата за демократски просперитет на Ромите од каде реагираат на едностраното претставување на инцидентот. Оттаму обвинија на долготрајна дискриминација и навреди кон нивниот сопартиец Аки Акиов од страна на советникот на ВМРО-ДПМНЕ, Васе Алексов, за што, како што велат, веќе е поднесена кривична пријава до ОЈО Кочани.