Кој е особено загрозен?

Особено чувствителни на жештина се луѓето со нестабилна циркулација на крвта – како хронично болни, лица со прекумерна тежина и постари лица. Бебињата и малите деца сè уште не можат доволно да се потат и затоа треба посебно да се заштитат. Додека здравото срце лесно се справува со дополнителниот напор од жештината, болното срце брзо доаѓа до границата на својата издржливост.

При екстремна жештина, кај некои лекови за срце и притисок може да биде потребна промена на дозата. Луѓето со слаби вени треба да носат компресивни чорапи во топли денови, за да се спречи згрутчување на крвта во нозете поради проширување на крвните садови, препорачуваат некои експерти. Тоа може дополнително да предизвика проблеми со крвотокот.

Колку течности се препорачуваат?

Во текот на денот треба да се внесуваат околу два и пол до три литри течности. Идеални се минерална вода, изладени билни и овошни чаеви или разредени овошни и зеленчукови сокови. Тие обично содржат доволно минерали за да ги надоместат изгубените соли преку потење.

Газирани пијалаци со многу шеќер, напротив, предизвикуваат уште поголема жед. Ледено студени пијалаци можат да предизвикаат стомачни проблеми, а телото мора дополнително да работи за да ја загрее течноста на телесна температура. Алкохолот е подобро да се избегнува, тој ги проширува крвните садови, што дополнително го оптоварува срцето.

На што да се внимава при исхрана?

Во исхраната треба да се избегнува тешка и мрсна храна, а подобро е да се јадат повеќе мали и лесни оброци со многу овошје и зеленчук. Иако премногу сол обично е штетна, во лето може да се дозволи малку повеќе, бидејќи преку потењето се губат многу соли и минерали.

Што носи олеснување?

Влажна крпа на вратот или околу рацете и нозете може да го разлади телото. Корисни се и ладни бањи за раце или стапала. Едноставен рачен вентилатор исто така помага, не мора секогаш да се користи електричен. Подигањето на нозете на неколку минути го олеснува крвотокот и спречува отекување.

Дали спортот е препорачлив?

Не секоја спортска активност при високи температури е штетна. Сепак, подолги физички напори и активности на отворено треба да се избегнуваат во пладневните и најтоплите часови. За постари лица, деца и луѓе со проблеми со крвниот притисок, спортот при жештини не се препорачува.

Каква заштита е можна во домот?

Надворешни ролетни, жалузини и капаци најдобро ги засенуваат просториите. Внатрешни ролетни или завеси помалку штитат од сончевите зраци. Тие барем треба да имаат светли или метализирани надворешни површини за подобра рефлексија. Корисни се и сончеви фолии, кои обично се затемнети и се поставуваат одвнатре на стаклото, но тие ги затемнуваат просториите.

Кога треба да се проветрува?

Здравствени организации препорачуваат: во многу топли денови, најдобро е да се проветрува навечер и рано наутро, кога надворешниот воздух е постуден од внатрешниот. Промената на воздух помага. Во текот на денот, прозорците и вратите треба да останат затворени.

Сепак, околу правилното проветрување при жештини има многу дискусии, експертите не се целосно согласни.

Што помага при заспивање?

Кој има потешкотии со заспивање поради жештината, може пред спиење да се истушира со млака, но не премногу студена вода. Влажноста не треба целосно да се избрише, туку да испари, тоа го разладува телото.

Препорачливо е и лесна, воздушеста пижама од природни влакна како памук. Таа добро ја апсорбира потта, телото ноќе може да испоти и до половина литар течност.

Дали фрижидерот мора да работи на највисока температура?

Не – за да се зачуваат свежи производите, доволни се 6 до 8 степени. Во принцип, електрични уреди што не се неопходни треба да се исклучат. Секој компјутер и секоја ламба испушта топлина.

Извор: Дојче веле