Заштитата на новинарството и безбедноста на новинарите и другите медиумски работници да биде политички приоритет за европските влади, порача генералната секретарка на Советот на Европа, Марија Пејчиновиќ Буриќ по повод 3 Мај, Денот на слободата на медиумите.

– Бидејќи новинарите и другите медиумски актери сѐ повеќе се предмет на непотребен притисок, заплашување, насилство и други форми на мешање во нивната работа во многу европски земји, треба итно да се осмислат национални акциски планови за безбедноста на новинарите, вели Пејчиновиќ Буриќ.

Според неа, владите треба да се осврнат на потребата да ја зајакнат заштитата на новинарите, ефикасно да ги гонат сторителите на злосторствата против нив и да ја подигнат свеста во нашите општества за клучната улога на различните и независни медиуми за зачувување на вистинската демократија.

– За да ги заштитиме нашите демократски слободи, од суштинско значење е државите да создадат поволна средина за процут на плуралните и независни медиуми за да ја играат својата суштинска улога на „чувар“. А за тоа да биде можно, тие мора да бидат способни да ги повикаат владите и другите актери да го промовираат учествувањето во јавната дебата и изразувањето идеи и мислења без страв, додава таа во пораката.

Антимедиумската реторика, како што вели, нема место во едно демократско општество, а с секоја закана или напад врз новинари треба да биде осудена од политичарите.

Пејчиновиќ Буриќ се осврнува и на неодамна објавениот годишен извештај за 2023 година на партнерите на Платформата за промовирање на заштитата на новинарството и безбедноста на новинарите „Војната во Европа и борбата за правото на известување“ во кој што се вели дека има загрижувачки тренд кон континуирана деградација на слободата на медиумите во некои земји, особено драстично во Русија и Белорусија.

– Фокусот сега треба да биде на ефективно спроведување во пракса на стандардите на национално ниво. Очекуваме претстојната петгодишна Кампања на Советот на Европа за безбедност на новинарите, која ќе започне во октомври 2023 година, да биде чекор напред во заштитата на новинарството и безбедноста на новинарите на европско ниво, поддржана со соодветни кампањи на национално ниво, порачува Пејчиновиќ Буриќ и додава дека одамна е време за значајна акција за решавање на влошувањето на слободата на печатот.