Потрошувачката на карагенан може да го наруши цревниот микробиом, кој е поврзан со голем број болести.

Карагенан, познат и како Е 407, се наоѓа во многу популарни слатки и деликатеси, а овој додаток (адитив) може да биде поттик за дијабетес тип 2, открија германските истражувачи.

Карагенан се користи во прехранбената индустрија како емулгатор и згуснувач, поради својата конзистентност на гел. Според хемиска структура, карагенан е сулфатен полисахарид добиен од црвени морски алги што се јадат.

Овој додаток на храна се наоѓа во млекото од соја, млечни шејковите и сладоледот, а новото истражување на научниците од Германија покажува дека овој додаток го зголемува ризикот од развој на дијабетес тип 2.

Во студијата објавена во списанието „БМС медисин“, на 20 мажи со просечна телесна тежина, на возраст меѓу 27 и 31 година, им биле дадени дози од 250 милиграми карагенан дневно во текот на две недели, како додаток на нивната нормална исхрана. Другата половина од испитаниците добиле плацебо.

Влијанието на карагенан врз нивото на инсулин

На крајот од двонеделното испитување, истражувачите ги подложиле учесниците на магнетна резонанца (МРИ) на мозокот и цревата за да проверат дали има знаци на воспаление, што е познат претходник на низа болести на цревата.

Тие, исто така, ја анализирале чувствителноста на учесниците на инсулин, хормон што го произведува панкреасот, а кој помага во регулирањето на нивото на шеќер во крвта. Кај дијабетес тип 2, телото развива нечувствителност на инсулин, што предизвикува шеќерот во крвта да достигне високи скокови и падови.

По две недели, податоците покажале дека кај испитаниците со просечна телесна тежина, кои користеле карагенан, се појавило одредено намалување на чувствителноста на инсулин, во споредба со учесниците во студијата кои примале плацебо.

Покрај тоа, кај дебелите учесници кои земале адитив, скенирањата на мозокот со магнетна резонанца откриле знаци на воспаление во регијата на хипоталамусот на мозокот, која е одговорна за метаболизмот на шеќерот и апетитот. Исто така, МР на цревата покажало зголемување на пропустливоста на тенкото црево – што значи дека поголемите, веќе потенцијално штетни бактерии можат да прејдат до цревата.

Овој феномен е поврзан со голем број здравствени состојби, вклучувајќи болести на срцето и дијабетес тип 2.

„Нашето истражување сугерира дека консумирањето карагенан, слично на она што е забележано во студиите за животни, може да ја загрози бариерната функција на цревата. Тоа може да има долгорочни здравствени последици и да го зголеми ризикот од воспалителни болести“, предупредил професорот Роберт Вагнер, клинички истражувач за болести на метаболизмот на Универзитетот Хајнрих Хајне во Дизелдорф и коавтор на истражувањето.

Инаку, две претходни студии спроведени на животни, покажале дека кај стаорците на кои им бил даден карагенан, имало намалена толеранција на гликоза, како и развој на инсулинска резистенција и нарушувања на секрецијата на инсулинот.

Постарите и дебелите луѓе се во поголем ризик

Истражувачите укажаа дека метаболичките ефекти од употребата на карагенан зависат од општата состојба на луѓето.

„Кај постарите или лицата со прекумерна телесна тежина, ефектите на карагенан врз инсулинската чувствителност би можеле да бидат посилни. За да се потврди ова, неопходни се дополнителни истражувања во овие групи на населението“, рекол професорот Норберт Стефан.

Ова, инаку, не е првпат експертите да идентификуваат врска помеѓу хемикалиите во ултра-преработената храна и развојот на сериозни болести.

Научниците претходно сугерираа дека емулгаторите може да го нарушат „одвојувањето“ помеѓу мрсниот и водниот слој во цревата, што доведува до празнини во заштитната слузница на цревата. Се смета дека ова може да го зголеми ризикот од бактериски инфекции во цревата, од кои е познато дека некои инфекции предизвикуваат на рак на цревата.