Општинската организација на Сојузот на борци од Народно-ослободителната и антифашистичка војна на Македонија 1941-1945 и граѓаните продолжувачи од Тетово побараа бојкот на процесот на менување на имиња предложени од Општината. Ова нивно барање следи по неодамнешниот повик на Општина Тетово денес, 4 април, граѓаните да учествуваат на првата јавна дебата на која ќе може да дадат предлози за имиња на улиците.

Сојузот на борци од НОАВМ и граѓани продолжувачи од Тетово упатија и до политичките партии, граѓанските здруженија, клубови и сите други облици на општествено здружување.

Тие сметаат дека треба да се бојкотира овој процес, кој го оценуваат како лажен, неискрен и опасен, отпочнат и воден од Општина Тетово и градоначалникот Билал Касами.

– Во петок на 04.04.2025 сценаристите имаат закажано претстава во која ќе глумат јавна дебата, во која очекуваат граѓаните да бидат статисти. Знаеме дека предлогот е одамна на бирото на Касами и оваа националистичка глума е обична фарса. Не поминува! Сите сме свесни за вашиот демократски капацитет, Касами. Процес во кој уште на самиот почеток хероите од Антифашистичката коалиција лично од Касами се претставени како темното минато. Не заслужува поддршка и учество од ниту еден разумен совесен и искрен патриот – се вели во соопштението.

Тие ги повикаа и советниците да не даваат поддршка во Советот, а државниот врв да не дозволи промена на имињата на улиците.

– Очекуваме советниците од македонска националност кои го формираат потребното квалификувано мнозинство за носење на одлука за промена на име на улица, а досега не отстапија од процесот, веднаш без одолговлекување јавно да се повлечат од процесот и истиот да пропадне во вода. Повикуваме на будност и поддршка од државниот врв и лидерствата на парламентарните партии, научните институции и медиумски куќи. Сојузот на борци од НОАВМ и продолжувачи од Тетово дава отпор на овој груб обид за историски ревизионизам, сепак не е фер толку важна битка да се остави само на наши плеќи – велат од тетовскиот Сојуз на борци.

Општина Тетово уште од август 2024 година го почна процесот за преименување улици кои веќе имаат определено име и именување на улици на кои името им е определено со бројка. Тогаш беше формирана работна група. Јавната дебата закажана за во петок во 15 часот, следи откако помина и еден период од еден месец од 10 февруари до 10 март, кога по повик на општината граѓаните по електронски пат имаа прилика да достават предлози за преименување на улици во Општина Тетово.