Министерката за образование и наука, Весна Јаневска најави дека се работи на три нови закони – за високо образование, за Агенција за квалитет во високото образование (АКВО) и за научно-истражувачка дејност, со цел студентите да добијат актуелни студиски програми и повеќе пракса, што ќе им овозможи полесно вработување.

Јаневска посочи дека околу 2.000 македонски студенти студираат во Словенија, бидејќи таа како членка на ЕУ им нуди поголеми можности. Таа оцени дека дел од проблемот е и застареноста на македонските студиски програми, кои ќе се реформираат во соработка со државните универзитети.

Министерката нагласи дека студентите во иднина треба да стекнуваат знаење и вештини споредливи со оние во земјите од ЕУ, за да ја задржат довербата дека и во Македонија можат да добијат квалитетно образование.

„За младите да останат, потребна е и поширока промена – почитување на право и правда, намалување на корупцијата и криминалот, како и враќање на чувството на припадност кон државата,“ рече Јаневска, додавајќи дека во минатото недоволно се работело на воспитување, интегритет и патриотизам кај учениците и наставниците.