Друштвото на писателите на Македонија со организацијата на настанот „Брз е векот“ ќе одбележи четири јубилеи за четворица автори, некогашни членови на ДПМ, кои живееле и твореле во изминативе стотина години.

На настанот ќе бидат чествувани јубилеите на Ката Мисиркова-Руменова (95 години од раѓањето), Живко Чинго (90 години од раѓањето), Ташко Георгиевски (90 години од раѓањето) и Тодор Чаловски (80 години од раѓањето).

Одбележувањето на јубилеите ќе се одржи на 5 јуни, во Друштвото на писателите на Македонија, со почеток во 12 часот, а на животот и делото на овие автори ќе потсетат и извадоци од нивни дела ќе прочитаат поетите и писатели Славе Ѓорѓо Димоски, Гоце Ристовски, Љубинка Донева и Марина Мијаковска.

Одбележувањето на јубилеите ќе биде отворено и затворено со музички настап на Марија Ристовска и Вегим Кучи, студенти од Факултетот за музичка уметност во Скопје.